Coma ei tradicion eth 4 de deseme de 2019, s’a celebrat era tradicionau hèsta de Santa Barbara, patrona des Pompièrs d’Aran.
[adrotate group=»1″]Entà commemorar aguest dia e, en tot dar un nau impuls institucionau ad aguesta hèsta, eth govèrn deth Conselh Generau d’Aran a premanit tot un seguit d’actes que comencèren eth passat 27 de noveme e an culminat aué, damb era celebracion d’ua jornada destinada a destacar era gran labor des nòsti pompièrs.
En tot acompanhar ath còs de Pompièrs-Emergéncies d’Aran, an prenut part d’aguesta jornada, ath delà deth govèrn d’Aran, eth director generau de Prevencion, Extincion d’Incèndis e Sauvament dera Generalitat, Manel Pardo, era Delegada deth Govèrn en Alt Pirineu e Aran, Rosa Amorós, era vicepresidenta dera Deputacion de Lhèida, Estefania Rufach e Ferran Accensi, e representants des Pompièrs der Estat Francés e Andorra, entre d’auti.
Dempús dera tradicionau missa ena glèisa de Santa Maria de Mijaran, s’a projectat eth vidèu commemoratiu qu’a elaborat eth Conselh Generau d’Aran entà dar a conéisher e méter en valor eth trabalh diari d’aguesti professionaus. Ath delà, pendent er acte s’a procedit ara entrèga des nomenaments des caps d’equip de Pompièrs-Emergéncies e des naui pompièrs volontaris per part deth sindic d’Aran, Francés Boya, e deth director generau de Prevencion, Extincion d’Incèndis e Sauvament dera Generalitat.
Entà finalizar er acte a prenut era paraula eth sindic d’Aran, en tot destacar “eth valor des Pompièrs coma un exemple de servici ara comunitat que mòstre era sua capacitat d’innovar e d’adaptar-se as naui tempsi en tot mantier era sua vocacion solidaria e de compromís damb eth país”.
[adrotate group=»1″]Info: Conselh Generau d’Aran