Er acte compdèc ath delà damb ua charrada de Patrici Pojada a l’escasença der An Robèrt Lafont.
[adrotate group=»1″]Er Institut d’Estudis Aranesi-Acadèmia aranesa dera lengua occitana presentèc eth darrèr diuendres dia 5 de junhsèga es darrères produccions dera Acadèmia ena sedença der Institut d’Estudis Catalans en Barcelona.
Er acte que compdèc damb era participacion deth president dera Academia aranesa, Jusèp Loís Sans e deth president der Institut d’Estudis Catalans (IEC), Joandomènec Ros, servic tà presentar es darrères produccions der IEA-AALO coma eth Dicionari e era Gramatica der aranés, era Gramatica der estandard der occitan, eth Vocabulari ortografic der aranés e eth Vocabulari des espòrts de nhèu, entre d’autes.
Ena presentacion tanben assistic Ester Franquesa, directora generau de Politica Lingüistica dera Generalitat de Catalonha; M. Teresa Cabré, presidenta dera Seccion Filologica der IEC; Jèp de Montoya, president dera Seccion Aranesa der IEA-AALO; Rosa Maria Salgueiro, secretària der IEA-AALO; Miquèu Segalàs, vocau der IEA-AALO, Jacme Taupiac, Claudi Balaguer, Joan Salas-Lostau, Maria Elvira Riu, Lordes España e Bernat Arrous, entre d’auti.
Es membres dera Academia Aranesa e der IEC mantengueren tanben ua jornada conjunta de trabalh
Pendent er acte, Patrici Pojada, membre dera Seccion estandard der Institut d’Estudis aranesi-Acadèmia aranesa dera lengua occitana e membre dera Seccion Istorico-Arqueologica der Institut d’Estudis Catalans, aufric ua charrada jos eth títol de «Robèrt Lafont e Catalonha», ena commemoracion der An Robèrt Lafont que se celèbre enguan.
Er an 2019 a estat declarat pera Generalitat de Catalonha coma «An Robèrt Lafont» a l’escasença deth detau aniversari dera sua mòrt. Robèrt Lafont ei considerat coma ua des mès granes figures istoriques der occitanisme. Siguec un intellectuau occitan e mès particularaments lingüista, escrivan, istorian, especialista dera literatura e teoric politic.
Entà acabar era presentacion des darrères produccions dera Acadèmia aranesa, es academics der IEA-AALO e der IEC mantengueren ua jornada conjunta de trabalh ena Sala Puig e Cadafalch der Institut d’Estudis Catalans.
[adrotate group=»1″]Info: IEA-AALO