Eth Centre de Joenessa “Antara” de Vielha e Mijaran contunhe damb eth cicle d’activitats mensuaus qu’auràn lòc pendent cada dissabte enquia acabar eth cors escolar.
En noveme i auec ua nauta participacion, pendent cada dissabte, enes activitats premanides en relacion a diuèrsi dies commemoratius importanti (talhèr de coctails sense alcoòl en dia mondiau sense alcoòl, pancarta que se mostrèc en dia internacionau contra era violéncia de genre e dinamica dera cadea de transmission en dia mondiau contra eth SIDA). Atau madeish, pendent cada dimenjada, eth centre ei cada viatge er espaci de mès joeni/es d’entre 12 e 16 ans, que l’empleguen entà tot tipe d’activitats de léser.
En tot veir er exit des activitats de noveme, de cara a d’aguest mes deseme s’a premanit un calendari d’activitats que demoren compdar damb ua nauta participacion dera joenessa deth municipi. En aguest sens, cau rebrembar que pendent es hèstes de Nadau, Antara demorarà dubèrt deth 20 de deseme ath 5 de gèr pera tarde en orari abituau, exceptat deth dia de Nadau e de Cap d’An, que serà barrat. En centre, es joeni/es pòden realizar tot tipe d’activitats de léser, damb ua gran varietat de jòcs e materiau de lectura, atau coma emplegar ordinadors.
“Es activitats de noveme aueren un gran exit de participacion, e demoram qu’en deseme seguisque assolidant-se coma ua opcion fixa en calendari dera nòsta joenessa”, comente eth dusau tinent d’alcalde e còsso de joenessa de Vielha e Mijaran, Alberto López. E hig que “des der Ajuntament volem qu’Antara sigue un referent entara nòsta joenessa, un espaci tà socializar e interrelacionar-se damb d’auti joeni/es deth municipi, en tot jogar o participar enes activitats qu’aufrim. Ei precisament era bona acuelhuda que i a en centre, çò que mos encoratge a trabalhar ena dinamizacion de mès accions enta da eri”.
Info: Ajuntament de Vielha e Mijaran