Era mejana de joeni/es qu’an passat peth locau, en aguest temps, a estat de 44 per dia, en tot profitar er aument d’activitats entà Nadau.
Eth Centre de Joenessa “Antara” de Vielha e Mijaran a enregistrat granes donades de visitaires pendent es mesi de deseme e gèr. En aguest temps, era cifra de joeni/es a estat superiora as 1200.
Era nauta afluéncia de visitaires a estat possibla gràcies ara planificacion d’activitats que cada setmana s’hèn de diuendres a dimenge, atau coma era implementacion d’accions pendent es hèstes de Nadau. Fin finau, era miejana de gent en “Antara” a estat de 44 per dia pendent aguest temps.
Pendent eth mes d’hereuèr s’an planificat fòrça mès accions que s’amien a tèrme toti es dissabtes
Atau madeish, de cara a d’aguest mes d’hereuèr, eth centre a desvolopat un seguit d’activitats que s’amien a tèrme pendent toti es dissabtes, damb: jòcs d’enigmes, talhèr d’smoothies, talhèrs “hand made”, damb objèctes hèti a man, e era celebracion dera hèsta de Magràs.
“Des der Ajuntament èm fòrça satisfèti pera nauta assisténcia de joeni/es en “Antara”, en tot verificar que se comence a assolidar coma un espaci de referéncia entara nòsta joenessa”, comente eth dusau tinent d’alcalde e còsso de joenessa, Alberto López. E hig que “de diuendres a dimenge fòrça gent emplegue aguest centre entà vier a jogar damb es amics/amigues, e damb era implementacion deth calendari d’activitats des dissabtes, artenhem que sigue un lòc fixe entà que poguen divertir-se totes es dimenjades”.
Info e fotos: Ajuntament de Vielha e Mijaran