Eth Conselh Generau d’Aran artenh era competéncia en matèria de gestion de grani carnivors dera fauna sauvatge.

Ena Comission Bilaterau entre era Generalitat de Catalunya e eth Conselh Generau d’Aran, s’a aprovat eth traspàs de competéncies en matèria de fauna sauvatge, qu’a de perméter ath govèrn aranés èster mès agil e eficient ara ora de solucionar es problematiques des ramadèrs derivades dera convivéncia damb er os.

Ager diuendres debanèc ena sedença deth Conselh Generau d’Aran era Comission Bilaterau entre era Generalitat de Catalunya e eth govèrn aranés, presidida pera conselhèra dera Presidéncia, Meritxell Budó, e eth sindic d’Aran, Francés Boya.

Era conselhèra Budó a volut dar es gràcies ath sindic e as conselhèrs e conselhères aranesi “pera sua acuelhuda en aguesta comission, que çò que plantege ei trabalhar de forma conjunta quines an d’èster es matèries de traspàs entà dar compliment ara Lei d’Aran”.

En aguesta amassada s’a aprovat er acòrd de traspàs de foncions dera Generalitat ath Conselh Generau en matèria de gestion de grani carnivors dera fauna sauvatge protegida en Aran. Aguesta competéncia includís era execucion des actuacions de gestion des grani carnivors mejançant eth seguiment des sues populacions e eth desvolopament des politiques de prevencion e compensacion des danhs produsidi per aguesti animaus as activitats ramadères presents en territòri.

Dauant aguest acòrd, eth sindic a manifestat era sua “satisfaccion per aguest traspàs que permeterà agilizar tota era tramitacion des ajudes as ramadèrs deth territòri e, molt especiaument, totes aqueres mesures que poguen ajudar a conciliar era pagesia en país damb era preséncia der os”.

Entà hèr efectiu aguest acòrd era Generalitat transferirà ath Conselh ua dotacion de 173.500 euròs annaus

Eth conselhèr de Territòri, Paisatge e Gestion Ambientau, Francés Bruna, afirme que “des deth govèrn deth Conselh Generau d’Aran se dèc dejà un prumèr pas entà milhorar era convivéncia dera ramaderia e es grani carnivors damb era modificacion deth decrèt de maus a fin d’aumentar eth valor indemnizable des atacs e equiparar-lo ath dera rèsta de comunitats vesies e França. Damb aguest traspàs de competéncies demoram poder èster molt mès eficients ara ora de solucionar es problematiques des nòsti ramadèrs”.

Imatge d’archiu der os Goiat. Aran Notícies

Damb motiu d’aguest traspàs, se crearà ua comission de coordinacion tecnica integrada per dues persones deth Departament de Territòri e Sostenibilitat dera Generalitat de Catalunya e dues mès deth Conselh Generau d’Aran. Aguesta comission, que s’amassarà coma minim dus còps ar an, aurà coma objectius establir ua estrategia de trabalh comuna, e establir mecanismes de coordinacion entà mantier ua accion conjunta ena gestion dera fauna sauvatge, entre d’auti.

Entà hèr efectiu aguest acòrd era Generalitat transferirà ath Conselh ua dotacion de 173.500 euròs annaus.

Info: Conselh Generau d’Aran