Deth 11 ath 17 de junh aurà lòc er Hestau “TerSon”, er hestau dedicat ara cultura en Aran, inclodit laguens des actes dera Hèsta d’Aran.

Era prumèra edicion der hestau “Terson. Eth son dera Tèrra” organizat peth Conselh Generau d’Aran entà prebotjar e balhar supòrt ara produccion culturau en territòri, restacada ara lengua e ath Pirenèu, permeterà qu’eth 17 de junh age tanben un caractèr popular e participatiu des entitats culturaus deth país.

Tad aguesta prumèra edicion s’an programat activitats totes eres restacades damb era lengua e era tèrra, exposicions, presentacions de libres, activitats entàs familhes e tanben se poiràn veir pèces de teatre e teatre musicau damb entitats que son consolidades en territòri, concèrts en aranés e occitan, damb grops coma Sarabat, Rambalh o Parpalhon. Atau madeish, eth grop “La Ronda de Boltaña” qu’arribe deth Pirenèu aragonés, participarà tanben d’aguest hestau.