Er Ajuntament de Vielha e Mijaran a començat a realizar pendent aguesta setmana, diuèrsi trebalhs de melhora deth sistèma de filtres der aigua des piscines de Vielha (exteriora deth Palai de Gèu) e de Gausac.
Aguestes òbres se detectèren a principis d’aguest ostiu, en moment de realizar es trebalhs de manteniment entara sua dubertura e des d’alavetz eth consistòri trebalhe damb es servicis tecnics entà apariar es deficiéncies que s’an ocasionat e auer es piscines en perfèctes condicions entà que se poguen gaudir a compdar deth mes de junhsèga.
Cau tier en compde qu’ambdues piscines son climatizades, an un tractament especiau, e per aquerò, s’an d’amiar a tèrme aguestes melhores de manèra urgenta en tot retardar eth periòde de dubertura abituau.
Ath delà dera piscina de Vielha, er ajuntament ajudarà economicament ara EMD de Gausac en tant qu’ei era unica piscina publica qu’ara madeish i a en municipi des de hè fòrça ans e preste servici a tot eth municipi de Vielha e Mijaran.
Segontes eth còsso d’Espòrts e Joenessa de Vielha e Mijaran, Alberto López, “des der ajuntament volem qu’es nòsti vesins e visitaires poguen gaudir des nòstes installacions damb era melhor qualitat possibla, per aquerò auem agut d’endarrerir era dubertura des piscines. Ath delà a hijut que “es dues piscines son climatizades e, en aguest sens, aguesti trebalhs s’an agut de hèr damb urgéncia, pr’amor que senon non aurien estat enes condicions avientes entàs usatgèrs”.
Des der Ajuntament de Vielha e Mijaran demanam desencuses pes inconvenients qu’age podut ocasionar eth retard dera dubertura des piscines, mès se trebalhe damb era màger rapidesa possibla entà solucionar aguestes deficiéncies e aufrir es piscines entar ostiu enes melhors condicions possibles.
Info: Ajuntament de Vielha e Mijaran